சுற்றம் மறந்தாய் ! சூழ்நிலை மறந்தாய் !

கடமையை மறந்தாய் ! கனவுகளை மறந்தாய் !

பெற்றோரை மறந்தாய் ! உன்னையே மறந்தாய் !

கைப்பேசியே  உலகமெனில், கற்றறிந்தென்ன பயன் !

ஓடி விளையாட மறுத்தாய் ! கைபேசி கைதியானாய் !

கண் வழியே பசியாறி, காற்றை உண்டு வாழ்கின்றாய் !

அமர்ந்த இடம் நீ மாற மறப்பது போல்,

ஆரோக்கியம் உன்வாழ்வில் மறந்திடுமே !

உன் பொறுப்பு, உன் கடமை எனதொன்றும் அறியாமல்

போதையிலே  மூழ்கடிக்கும் பேதமை வந்ததென்ன !

ஊருக்கு ஒரு வாழ்வு மையம் குடிநோய்க்கு வந்தது போய்,

இனி வீதிக்கொரு வாழ்வு மையம் இன் நோய்க்குத் தேவையிங்கே!

காலமெல்லாம் பணி செய்ய, தாய் தந்தை வீற்றிருக்க !

காலமெல்லாம்  பயணிக்க, காலன் தான் விடுவானா !

நஞ்சு கலக்க, நாய்கள் காத்திருக்க, நச்சு கலயத்தை

கையில் குடுக்க, நச்சுக்கிருமி வாய்ப்பளிக்க !

நாகப்பாம்பு விஷத்திற்கும் மருந்திங்கே உள்ளதடா !

இந்த நஞ்சறுக்க மருந்திங்கே இல்லையடா !

வீடியோ கேமாடி, விரல் நீளம் குறைந்து போச்சே !

ஐபில் யாரோ ஏலமெடுக்க, உன்னை அடகுவைச்சே !

வீதியில் பெண் நடக்க, வீதிக்கொரு நாய் அப்போ !

எண்ணிலடங்கா எச்சங்கள் விரல் நுனியில் வந்ததிப்போ !

மூழ்கிடுவர் தொடு திரையில் பல்முளைக்கா பாலகரும்,

இளந்தாயும்  அவ்விதமே  தொல்லை விட்டால் போதுமென!

தீமையறியா பெண்பிள்ளை வளர்ந்ததனால்,

தீமை வித்தொன்று விதைக்கின்றாள் அவள் சேய்க்கு !

நீடுழி வாழ்கவென பெற்றோர் நினைத்திருக்க !

ஊழைப் பிழையாக்க, விளைய நீ முயல்வதேன் !

இயங்க மறுத்தால், எலும்பு கூட துருப்புடிக்கும் !

எழுந்து நடந்தால், இமயங்கூட கைக்கெட்டும் !

கைவிலங்கு சாவி உங்கையில் தானிருக்கு !

கண் திறந்து பாரு, காலமிங்கே காத்திருக்கு !

சிந்தையது தெளிவானால், உன்சக்தி நீயறிவாய் !

உன் சக்தி நீயறிந்தால் , உலகமுன்  கைவசமே !

--RK 7- 6 - 2021